ರೈತರಿಗೆ ಉತ್ತಮ ಬಿತ್ತನೆ ಬೀಜಗಳನ್ನು ಒದಗಿಸಿ

ಜಗಳೂರು: ಮುಂಗಾರು ಉತ್ತಮವಾಗಿದ್ದು ತಾಲೂಕಿನ 54 ಸಾವಿರ ಹೆಕ್ಟೇರ್ ಪ್ರದೇಶದಲ್ಲಿ ಮುಂಗಾರು ಬಿತ್ತನೆ ಚುರುಕುಗೊಂಡಿದ್ದು ಕೃಷಿ ಇಲಾಖೆಯ ಅಧಿಕಾರಿಗಳು ಉತ್ತಮ ಗುಣಮಟ್ಟದ ಬಿತ್ತನೆ ಬೀಜಗಳನ್ನು ರೈತರಿಗೆ ಒದಗಿಸಿ ಎಂದು ಶಾಸಕ ಎಸ್.ವಿ.ರಾಮಚಂದ್ರ ಹೇಳಿದರು.

ಗುರುವಾರ ಸಂಜೆ ಪಟ್ಟಣದ ಎಪಿಎಂಸಿ ಆವರಣದಲ್ಲಿ ಕೃಷಿ ಇಲಾಖೆ ಅಡಿ ಕೃಷಿ ಅಭಿಯಾನ-2022-23ನೇ ಸಾಲಿನ ಬಿತ್ತನೆ ಬೀಜಗಳನ್ನು ವಿತರಿಸುವ ಕಾರ್ಯಾಕ್ರಮಕ್ಕೆ ಹಸಿರು ಬಾವುಟ ತೋರಿಸಿ ಚಾಲನೆ ನೀಡಿದ ನಂತರ ಮಾತನಾಡಿದರು. ಕೃಷಿ ಇಲಾಖೆಯಿಂದ ಒಳ್ಳೆಯ ಕಾರ್ಯವಾಗುತ್ತಿದ್ದು ಸಹಾಯಕ ಕೃಷಿ ನಿರ್ದೇಶಕ ಬಿ.ವಿ.ಶ್ರೀನಿವಾಸುಲು ರೈತ ಸ್ನೇಹಿಯಾಗಿ ಕೆಲಸ ಮಾಡುತ್ತಿದ್ದಾರೆ.

ಕೃಷಿ ಇಲಾಖೆ ಅಂದರೆ ಅಲ್ಲಿ ದೂರುಗಳೇ ಹೆಚ್ಚು ಆದರೆ ಜಗಳೂರು ಕ್ಷೇತ್ರದಲ್ಲಿ ಪ್ರತಿಯೊಬ್ಬ ರೈತ ನಾಯಕರು ಮತ್ತು ಜನ ಸಾಮಾನ್ಯರು ಅವರ ಕಾರ್ಯವನ್ನು ಮೆಚ್ಚಿದ್ದಾರೆ ಎಂದು ಶ್ಲಾಘಿಸಿದರು. ರೈತರು ಏನೇ ಸಮಸ್ಯೆಗಳಿದ್ದರೂ ಮುಕ್ತವಾಗಿ ಹೇಳಿ ಸ್ಥಳದಲ್ಲೇ ಬಗೆಹರಿಸುತ್ತೇವೆ. ಮುಂಗಾರು ಮಳೆ ಅವಧಿಗಿಂತ ಮೊದಲೇ ಕಾಲಿಟ್ಟು ಕೆಲವು ಕೆರೆಗಳು ಭರ್ತಿಯಾಗಿವೆ. ರೈತರು ಉತ್ತಮವಾಗಿ ಬೆಳೆ ಬೆಳೆದು ರೈತರ ಮುಖದಲ್ಲಿ ಮಂದಹಾಸ ಮೂಡಲಿ ಎಂದು ಆಶಿಸಿದರು.

ಇದೇ ವೇಳೆ ಸಹಾಯಕ ಕೃಷಿ ನಿರ್ದೇಶಕ ಬಿ.ವಿ.ಶ್ರೀನಿವಾಸುಲು ಮಾತನಾಡಿ, ತಾಲೂಕಿನಲ್ಲಿ ಪೂರ್ವ ಮುಂಗಾರು ಉತ್ತಮವಾಗಿದ್ದು ಜಗಳೂರು ಕ್ಷೇತ್ರ ವ್ಯಾಪ್ತಿಯಲ್ಲಿ 10 ಬಿತ್ತನೆ ಬೀಜಗಳ ಕೇಂದ್ರಗಳನ್ನು ತೆರೆಯಲಾಗಿದೆ. ಗುಣಮಟ್ಟದ ಬೀಜಗಳನ್ನು ಪೂರೈಸಲು ಕೃಷಿ ಇಲಾಖೆ ಸಿದ್ದವಾಗಿದೆ. ಈಗಾಗಲೇ ಮೂರು ಸಾವಿರ ಹೆಕ್ಟೇರ್ ಬಿತ್ತನೆಯಾಗಿದೆ. ಕ್ಷೇತ್ರದ 10 ಕಡೆ ಕೇಂದ್ರಗಳನ್ನು ತೆರೆಯಲಾಗಿದೆ.

ಕಸಬಾ ಹೋಬಳಿಯಲ್ಲಿ ಜಗಳೂರಿನ ಎಪಿಎಂಸಿ ಆವರಣ, ಅಣಬೂರಿನ ರೈತ ಉತ್ಪಾದಕ ಕಂಪನಿ, ಬಿಳಿಚೋಡು ಹೋಬಳಿಯ ಆರ್‌ಎಸ್‌ಕೆ ಮತ್ತು ಹಾಲೇಕಲ್ಲು ಗ್ರಾಮದ ಕೃಷಿ ಪತ್ತಿನ ಸಹಕಾರ ಸಂಘದಲ್ಲಿ, ಅಸಗೋಡಿನಲ್ಲಿ ಒಂದು ಕೇಂದ್ರದಲ್ಲಿ ಬಿತ್ತನೆ ಬೀಜಗಳನ್ನು ಮಾರಾಟ ಮಾಡಲು ಅವಕಾಶ ನೀಡಲಾಗಿದೆ. ಹೊಸಕೆರೆ ಹೋಬಳಿಯಲ್ಲಿ ಆರ್‌ಎಸ್‌ಕೆ, ಒಂದು ರೈತ ಉತ್ಪಾದಕರ ಕಂಪನಿ, ಸೊಕ್ಕೆ, ಬಸವನಕೋಟೆ, ಕೆಚ್ಚೇನಹಳ್ಳಿ ಗ್ರಾಮಗಳಲ್ಲಿ ದಾಸ್ತಾನು ಮಾಡಲಾಗಿದೆ. 3800 ಕ್ವಿಂಟಾಲ್ ಬಿತ್ತನೆ ಬೀಜ ದಾಸ್ತಾನು ಮಾಡಲಾಗಿದೆ.

ಬಿತ್ತನೆ ಬೀಜಗಳಿಗೆ ಕೊರತೆಯಿಲ್ಲ. ಗುಣಮಟ್ಟಕ್ಕೆ ಸಂಬಂಧಿಸಿದಂತೆ ಎಲ್ಲ ಪರಿಕರ ಮಾರಾಟಗಾರರ ಕೇಂದ್ರಗಳಲ್ಲಿರುವ ಬೀಗಳನ್ನು ಪ್ರಯೋಗಾಲಯಕ್ಕೆ ಕೊರತೆಯಿಲ್ಲ. ರೈತರು ಹರಿಬಿರಿ ಬಿತ್ತನೆ ಮಾಡದೇ ತೇವಾಂಶ ನೋಡಿಕೊಂಡು ಬಿತ್ತನೆ ಮಾಡಿ ಎಂದು ಸಲಹೆ ನೀಡಿದರು.

ಈ ವೇಳೆ ತಹಶೀಲ್ದಾರ್, ಜಿ.ಸಂತೋಷ್ ಕುಮಾರ್, ಪಟ್ಟಣ ಪಂಚಾಯಿತಿ ಅಧ್ಯಕ್ಷ ಸಿದ್ದಪ್ಪ, ಸಹಾಯಕ ಕೃಷಿ ಅಧಿಕಾರಿ ಕೃಷ್ಣಪ್ಪ, ಸಿಪಿಐ ಮಂಜುನಾಥ್ ಪಂಡಿತ್, ಬಿಜೆಪಿ ಮುಖಂಡ ಬಿಸ್ತುವಳ್ಳಿ ಬಾಬು ಸೇರಿದಂತೆ ಕೃಷಿ ಇಲಾಖೆ ಅಧಿಕಾರಿಗಳು ಮತ್ತು ಬಿಜೆಪಿ ಕಾರ್ಯಕರ್ತರು, ಪಪಂ ಸದಸ್ಯರು ಉಪಸ್ಥಿತರಿದ್ದರು.

 ಬಿತ್ತನೆ ಬೀಜ ದಾಸ್ತಾನು ವಿವರ

ರಾಗಿ ಬೀಜ-30 ಕ್ವಿಂಟಾಲ್
ಮೆಕ್ಕೆಜೋಳ-1100 ಕ್ವಿಂಟಾಲ್
ಸಜ್ಜೆ-12 ಕ್ವಿಂಟಾಲ್
ಸಿರಿಧಾನ್ಯಗಳು-3ಕ್ವಿಂಟಾಲ್
ಶೇಂಗಾ2656 ಕ್ವಿಂಟಾಲ್

ಉತ್ತಮ ಕಾರ್ಯಕ್ಕೆ ಶ್ಲಾಘನೆ

ಪಟ್ಟಣ ಪಂಚಾಯಿತಿ ಪಿಎಂಕೆಎಸ್‌ವೈ ಯೋಜನೆ ಅಡಿಯಲ್ಲಿ ಅದ್ಭುತವಾಗಿ ಕೆಲಸ ಮಾಡಿದ್ದಾರೆ. ದೊಣೆಹಳ್ಳಿ ಗ್ರಾಮದಲ್ಲಿ ದೊಡ್ಡ ಚಕ್‌ಡ್ಯಾಂ ನಿರ್ಮಾಣ ಮಾಡಿರುವ ಸಹಾಯಕ ಕೃಷಿ ನಿರ್ದೇಶಕ ಬಿ.ವಿ.ಶ್ರೀನಿವಾಸುಲು ಕಾರ್ಯ ಶ್ಲಾಘನೀಯ.
-ಎಸ್.ಸಿದ್ದಪ್ಪ, ಪಪಂ ಅಧ್ಯಕ್ಷರು.